جاڭا وقۋ جىلىنىڭ باستالۋىنا دا ساناۋلى كۇندەر قالدى. ال جامبىل وبلىسىندا جاڭا وقۋ جىلىنا ازىرلىك بارىسى قانداي دەڭگەيدە؟ بۇگىن تاراز قالاسىنداعى «ARAI PLAZA» بيزنەس ورتالىعىندا «قازاقستاننىڭ جاڭعىرۋى 3.0 – ءبىلىمنىڭ ۇلەسى» اتتى وبلىستىڭ پەداگوگيكالىق قىزمەتكەرلەرىنىڭ تامىز كونفەرەنتسياسى ءوتتى. وعان وڭىردەگى بارلىق ءبىلىم وشاعىنىڭ باسشىلارى مەن مۇعالىمدەر قاتىستى.
– ءبىز ءبىرىنشى قىركۇيەكتە 1700 وقۋشىعا ارنالعان 4 مەكتەپتى پايدالانۋعا بەرەمىز. جىل سوڭىنا دەيىن تاعى ءبىر مەكتەپ اشىلادى. بيىل 9 مەكتەپتىڭ قۇرىلىسىن باستادىق. ونىڭ ىشىندە «نۇرلى جول» باعدارلاماسى اياسىندا, ۇلتتىق قور قاراجاتى ەسەبىنەن 2 مەكتەپ سالىنۋدا. وسىلايشا وبلىستاعى 7 اپاتتى, 4 ءۇش اۋىسىمدى مەكتەپتىڭ ماسەلەسى تولىعىمەن شەشىلەدى. قالعان 2 اپاتتى جانە 1 ءۇش اۋىسىمدى مەكتەپتىڭ ماسەلەسى 2018 جىلى شەشىلمەك. مۇنىڭ بارلىعى دا ءبىزدىڭ بولاشاعىمىز ءۇشىن جاسالعان ەڭ ماڭىزدى ينۆەستيتسيا. مەملەكەتتىڭ جاس ۇرپاقتىڭ ءبىلىمى مەن تاربيەسىنە دەگەن ەرەكشە قامقورلىعى – دەدى جامبىل وبلىسىنىڭ اكىمى كارىم كوكىرەكباەۆ.
الايدا, شاعىن جيناقتى مەكتەپتەردىڭ جاعدايى دا ءبىلىم بەرۋ سالاسىنداعى وزەكتى ماسەلەلەردىڭ ءبىرى. وبلىستاعى مەكتەپتەردىڭ 31 پايىزى, ياعني 140 مەكتەپ شاعىن جيناقتى مەكتەپتەر. ءوز سوزىندە اكىم مۇنداي مەكتەپتەردە ارنايى پاندىك كابينەتتەردىڭ جەتكىلىكسىز ەكەنىن, وقۋشى سانى از بولعاندىقتان, ءبىر وقۋ كابينەتىندە ەكى, ءۇش سىنىپتىڭ بالالارى توپتاسىپ وقيتىن باستاۋىش مەكتەپتەردىڭ دە بار ەكەنىن ايتىپ ءوتتى. ولاردا جاڭارتىلعان مازمۇندا ءبىلىم بەرۋدى تولىعىمەن ىسكە اسىرۋ مۇمكىن ەمەستىگىنە دە توقتالدى.
بۇگىندە وبلىستا بالاباقشا كەزەگىندە 33 مىڭنان استام بالا تۇر. بۇل اسىرەسە تاراز قالاسى مەن بايزاق, قورداي, مەركى جانە ت.رىسقۇلوۆ اۋداندارىندا بايقالادى. سوڭعى جەتى جىلدا جەكەمەنشىك بالاباقشالار سانى 78-گە جەتسە, جىل سوڭىنا دەيىن تاعى 955 ورىندىق 16 جەكەمەنشىك بالاباقشا اشىلاتىن بولادى. سونداي-اق, تامىز كەڭەسىندە بارلىق اۋداندار جەكەمەنشىك بالاباقشالارعا مەملەكەتتىك تاپسىرىستى ارتتىرۋ قاجەتتىگى دە ءسوز بولدى. الايدا, مويىنقۇم جانە تالاس اۋداندارىندا مەملەكەتتىك-جەكەمەنشىك سەرىكتەستىك اياسىندا بىردە-ءبىر مەكتەپكە دەيىنگى مەكەمە اشىلماعان. سونىمەن قاتار, بايزاق, قورداي, شۋ اۋداندارى مەن تاراز قالاسىنداعى مەكتەپتەردە وقۋشى ورىندارىنىڭ جەتىسپەۋشىلىگى بار بولىپ وتىر.
حاميت ەسامان,
«ەگەمەن قازاقستان»
